Së bashku me ecurinë në kampionat Flamurtari po mendon që tani për të përforcuar më tej skuadrën. Vlonjatët kanë patur një ecuri të jashtëzakonshme këtë sezon por, mesa duket, oreksi vjen duke ngrënë dhe tashmë sytë e drejtuesve janë kthyer për të përforcuar një ekip, që është i fortë. Lajmi është konfirmuar nga trajneri Shpëtim Duro menjëherë pas barazimit në shtëpi me Teutën, në emisionin “Gol pas Goli”.
Do të ndërhyjmë në merkato. Do të afroj dy apo tre futbollistë, të cilët i kam në kokë.
Mesa duket, timonieri i Flamurtarit i ka idetë e qarta për të rritur nivelin e skuadrës. Trajneri Duro ka treguar në të shkuarën se nuk ndërhyn në merkato thjesht për të bërë merkato, por për të përmirësuar grupin që ka në dispozicion. Mendohet që në kokën e 58-vjeçarit nga kryeqyteti vërtiten emra konkretë, ku më së shumti kërkohet një numër 10 për të rritur cilësinë e ekipit në manovrën sulmuese, pasi u pa qartë që ndaj Teutës ekipi vuajti shumë mungesën e kapitenit dhe goleadorit Tomislav Busic.
