Boks

Ferit Keta mposht me knock out rivalin dhe shpallet kampion

Ferit Keta fitoi titullin kampion gjerman, në peshën “Cruiser”. Boksieri shqiptar sfidoi 31-vjeçarin gjerman Toni Thes, në ndeshen e 9, të karrierës së tij, duke fituar me Konck out teknik. Boksieri nga Bulqiza e fitoi duelin brenda 4 raundeve, duke hedhur në tokë kundërshtarin dhe dalë triumfator nga ringu.

Vetëm dy muaj pas titullit gjerman të fituar në kikboks, Ferit Keta bëhet gjithashtu kampion i vendit teuton edhe në boks, në peshën “Cruiser”, pra peshën deri 90.7 kg.

Ky ishte vetëm takimi i 9 në boks për 29-vjeçarin dhe natyrisht që konsiderohet një arritje e madhe, duke patur parasysh që sportisti shqiptar ka filluar ndeshjet në boksin profesionist vetëm 20 muaj më parë. Ndeshja u zhvillua në Gjermani dhe ky ishte takimi i 8 që Ferit Keta zhvillon në këtë shtet, pas duelit të debutimit me serbin Haris Calakoviç në muajin shkurt të vitit të kaluar, në Tiranë në Pallatin e Sportit ‘Asllan Rusi’.

Vetëm katër muaj më parë 29-vjeçari fitoi titullin europian në ISKA, në kikboks ndaj holandezit Rochel Gumuljo dhe gjerdanin e artë në atë takim ia dha i madhi Luan Krasniqi. Vlen të përmendet fakti që në sportin e boksit Ferit Keta nuk njeh asnjë humbje, duke fituar 9 nga 9 ndeshjet e zhvilluara, madje pjesën më të madhe, me knock out.

Titulli në kategorinë “Cruiser” ishte vakant dhe dueli i fundit për brezin e kësaj peshe në boksin gjerman, është fituar nga Adam Deines, pasi mposhti në ‘Erdgass Arena’, në Sachsen-Anhalt, boksierin tjetër Bjoern Blaschke.

To Top