Derbi i radhës i Moskës në fazën play off të Euroleague-s së basketbollit shkoi për Khimkin. Skuadra e drejtuar nga trajneri grek Bartzokas triumfoi 79 – 73 ndaj CSKA-së, që humbi mundësinë për ta mbyllur çështjen e kualifikimit. Tashmë rezultati i serisë së ngushtohet në 2-1, me sfidën e radhës qe e sheh sërish Khimkin skuadër pritëse.
I papërmbajtshëm në këtë takim të tretë talenti i Khimkit Shved, që shënoi plot 27 pikë, duke fituar edhe duelin brenda sfidës me Higgins të CSKA-së, që realizoi vetëm një pikë më pak. Shumë të rëndësishme në suksesin e Khimkit rezultuan edhe 22 pikët e Gill.
Reali i Madridit e shfrytëzoi më së miri faktorin fushë ndaj Panathinaikosit, duke e mposhtur skuadrën greke 81 – 74 në “WiZink Center” të kryeqytetit spanjoll. Bëri të pamundurën Calathes i Panathinaikosit, duke shënuar 26 pikë, dhënë 4 asite dhe rikuperuar 3 topa nën tabelë, por madrilenët u mbështetën te loja në grup dhe lojtarët e stolit për të marrë një fitore të rëndësishme, që i afron me kualifikimin në “Final Four”. Edhe takimi i katërt i serisë do luhet në Madrid.
