E ardhmja e Ergys Kaçes është një prej temave të nxehta te PAOK-u, me karrierën e futbollistit që sipas të gjitha gjasave do të vazhdojë larg klubit nga Selaniku. Pasi e nisi sezonin si protagonist, duke luajtur në ndeshjet e para të superligës greke, për afro tre muaj mesfushori nuk është aktivizuar në ndeshjet e kampionatit nga trajneri Lucescu.
Aktivizimi i tij i fundit ishte ai në ndeshjen e 29 Nëntorit të kaluar, ku PAOK-u fitoi 5-0 në fushën e Aiginiakosit, e vlefshme për Kupën e Greqisë. Situata e krijuar rreth 24-vjeçarit e bën thuajse të paevitueshëm largimin, ndërsa menaxheri i Kaçes ka diskutuar në disa raste me drejtuesit e klubit për këtë situatë.
Në fund duket se palët kanë gjetur dakordësinë se lëvizja më e mirë për të gjithë do të ishte që lojtari të transferohej në një tjetër skuadër gjatë merkatos së Janarit. Me këtë lëvizje Ergys Kaçe synon të gjejë një klub ku të ketë hapësira për të treguar kualitetin e tij, por mbi të gjitha për të qenë në formë dhe të mbajë vendin në Kombëtare për periudhën e përgatitjeve drejt kualifikueseve të Europianit 2020 dhe të Ligës së Kombeve.
