Drita e Gjilanit ka marrë një tjetër fitore 3-1 ndaj Trepçës ’89, duke ruajtur kryesimin e kampionatit me 3 pikë diferencë, teksa i shkoi shumë pranë titullit kampion.
Gjithsesi fitorja në minutat shtesë e Prishtinës, ka bërë që titulli tashmë të vendoset vetëm në javën e fundit, ku kryeqytetasit do të përballen me Dritën.
Në sfidën e pasdites së sotme në Gjilan, Drita e pa veten në disavantazh shumë shpejt, pas golit të shënuar nga Oto John për Trepçën.
Skuadra e drejtuar nga Bekim Isufi u zgjua në pjesën e dytë dhe arriti të shënojë 3 herë në portën e skaudrës nga Mitrovica, duke përmbysur rezultatin nga 0-1 në 3-1 dhe duke marrë 3 pikët.
Nga ana tjetër, në Prizren, Liria rezistoi deri në minutën e 93-të, kur u ndëshkua nga futbollistët e Prishtinës, të cilët morën 3 pikët dhe mbajtën gjallë shpresat për titull, ndonëse për këtë do t’u duhet një mrekulli në finalen e sezonit ndaj Dritës.
Theksojmë se Drita është ndjeshëm më e avantazhuar sesa skuadra e drejtuar nga Mirel Josa, pasi ka 3 pikë avantazh dhe mbi të gjitha, duhet të mos humbë me më tepër se një gol diferencë, për të festuar titullin.
Në sfidën tjetër të javës së 32-të, luajtur këtë pasdite, Llapi mposhti në Podujevë Flamurtarin me rezultatin e thellë 3-1, falë dopietës së Mirlind Dakut dhe golit të Mentor Zhdrellës.