Në prag të takimit miqësor Itali-Argjentinë, edhe Gigi Di Biagio ka dalë në konferencën e zakonshme për shtyp, i shoqëruar nga kapiteni dhe lideri i Italisë, Gigi Buffon. Tekniku i përkohshëm i Italisë ka injoruar deklaratat e menaxherit të Balotellit, ndërsa tha se është i përqendruar te puna me kombëtaren .
Debutoni në pankinën e Italisë. Keni emocione?
Di Biagio: Nuk kam kohë për të provuar emocionet, pasi duhet të jem i përqendruar te puna dhe të orientoj sa më mirë skuadrën në fushë.
Si i keni pritur fjalët e Raiolës?
Di Biagio: I lexova, por pas dy minutash iu riktheva punës me skuadrën dhe vijuam stërvitjen.
Çfarë i keni kërkuar skuadrës për këtë takim?
Di Biagio: Duhet të ndalojmë se menduari për të shkuarën dhe të luajmë futboll në fushën e lojës. Nga nesër duhet të ndryshojmë faqe dhe duhet ta bëjmë këtë gjë shumë shpejt, me dëshirën dhe entuziazmin e duhur.
A priten ndryshime në modulin e Italisë?
Di Biagio: Po, pasi do të rreshtohemi me 4-3-3. Mendoj se duke parë karakteristikat e lojtarëve që kemi në dispozicion, kjo është skema ideale. Shumica e tyre luajnë në rreshtimin 4-3-3 në skuadrat respektive, ndaj mendoj se do të përshtaten më lehtë.
