Skënderbeu mori një tjetër fitore dhe thelloi në 11 pikë distancën me ndjekësin më të afërt, që sonte ishte kundërshtari direkt. Trajneri Daja shprehet mjaft i lumtur për fitoren, por edhe për mënyrën sesi skuadra e interpretoi ndeshjen.
“Diferenca e konsiderueshme e pikëve na jep një qetësi psikologjike, por edhe garancia jonë është se po futemi në rrjedhën e duhur, pasi kemi rikuperuar edhe thuajse të gjithë kontigjentin e lojtarëve. Ne kemi një stil loje, të cilin nuk mund ta anashkalojmë lehtë. Kërkuam të fitojmë ndeshjen, ndryshe nga kundërshtari, që ishte i kënaqur edhe me barazimin. Në pjesën e dytë e rritëm më shumë tempin, duke përmirësuar gabimet e 45-minutëshit të parë dhe arritëm të gjejmë golin, ndonëse nëpërmjet goditjes standarde”, u shpreh Daja.
Skënderbeu vuajti shumë ndaj Flamurtarit, ndërsa ky ishte një nga takimet e pakta ku bardhekuqtë krijonin kaq pak mundësi shënimi, veçanërisht në 45 minutat e para.
“Luanim ndaj vendit të dytë dhe nuk ishte aspak e thjeshtë. Natyrisht që vuajtëm disi në pjesën e parë, por rikuperuam në të dytën, ku u treguam më të shpejtë në manovra dhe ndërtim aksionesh. Sigurisht që nuk goditëm në portë, por shkuam shumë herë në zonën e Flamurtarit. Ndoshta do kishte qenë më mirë që të kishim sulmuar me linjat e dyta, duke goditur nga distanca, por tentuam vazhdimisht të hyjmë në zonë me kombinime të shpejta”, u shpreh trajneri i kryesuesve.
