Pasditja e të shtunës solli humbjen e 4-t të Chelseat në këtë sezon, në Premier League, teksa u mposht 1-0 nga West Ham. Trajneri Antonio Conte u shpreh mjaft i zhgënjyer për këtë rezultat dhe pranoi se mbrojtja e titullit është tashmë e pamundur.
“Kjo ishte humbja jonë e 4-t në 16 ndeshje dhe eksperienca na ka mësuar se nuk mund të fitohet titulli nëse ti humb më tepër sesa 1 ose 2 takime në javët e para. Duket qartë që misioni për mbrojtjen e titullit është tashmë i dështuar, por ne do të tentojmë deri në fund të qëndrojmë pranë kryesuesve”, tha italiani.
Ndonëse nuk e thotë hapur se pret përforcime në janar, Antonio Conte lë të kuptohet pikërisht këtë gjë, taksa kalon topin te drejtuesit e skuadrës. Sipas italianit, fjalën e fundit për merkaton do ta thonë ata dhe tani vendimi është marrë.
“Nuk mund të them asgjë për merkaton, sepse është mirë të pyeten drejtuesit e klubit. Ata e dinë mendimin tim dhe e kanë marrë edhe vendimin e tyre, ndaj nuk besoj se ka rëndësi ta them hapur tani”, tha trajneri i Chelseat.
