Renditja e Eriglent Prizrenit i pesti në botë në kampionatin botëror të mundjes për të rinj për stilin e lirë që po zhvillohet në Tempere te Finlandës, tregon edhe një herë se sa shumë potencial ka Shqipëria në këtë sport individual. Presidenti shqiptar i Mundjes, Martin Biba, duke iu referuar arritjes së Prizrenit theksoi në një konferencë për shtyp që ky është një sinjal mjaft domethënës për vazhdimësinë e mundjes sonë.
Talenti Prizreni, një mundës i ri me shumë ambicie, shjegoi se mundësitë e tij ishin për t’u futur në zonën e medaljes, por një problem fizik e penalizoi përballë rivalit iranian.
Largimi i mundësve më të mirë jashtë Shqipërisë për arsye financiare është një problem që sipas presidentit Biba duhet të trajtohet me shumë kujdes nga qeveria,duke rritur grantet për sportin dhe vecanërisht për mundjen.
E vetmja mundësi për t’u paraqitur me ekip të plotë në Ballkaniadë, sipas Bibës, është mbështetja më e madhe financiare.
Biba i bëri thirrje Bashkisë së Tiranës që ta shohë me prioritet vënien sa më parë në funksionim të palestrës së mundjes, për t’u dhënë mundësi sportistëve që të përgatiten sa më mirë për ventet ndërkombëtare.
