Alarm te Bayerni i Mynihut për gjendjen fizike të Arturo Vidal. Gjatë stërvitjes së kësaj të diele, vetëm një ditë pas fitores 5-1 me Borussian e Moenchengladbahut, mesfushori kilian ka pësuar një dëmtim në gjurin e djathtë gjatë ndeshjes së kontrollit mes titullarëve dhe ekipit rezervë.
Vidalit iu desh të mbështetej te Ribery dhe Toni Tapalovic, trajner i portierëve, për t’u ngjitur në një makinë golfi, duke braktisur fushën.
Fytyra e Vidalit të linte përshtypje aspak të mira, sepse bëhet fjalë për të njëjtin dëmtim që e detyroi të braktiste fushën në ndeshjen e 3 prillit me Sevillan në Champions. Pritet tashmë komunikata e klubit bavarez, për të sqaruar shkallën e dëmtimit dhe kohën që i duhet futbollistit për të qenë gati nën urdhrat e Heynckes.
