Bayern Munchen nuk lëshon pe në Bundesligën gjermane, edhe pse e ka arkivuar çështjen e titullit kampion. Skuadra bavareze regjistroi një fitore të pastër në fushën e Hanoverit, duke e mundur këtë të fundit 3-0.
Pjesa e parë e sfidës përfundoi 0-0, ndërsa në të dytën Heynckes hodhi në fushën e lojës Muller e Lewandowskin, të cilët ishin në stol gjatë 45 minutave të para. Ishte pikërisht Muller ai që zhbllokoi rezultatin për Bayern, gol që u shoqërua nga ai i Lewandowskit.
Në minutat e fundit të ndeshjes, Rudy shënoi golin e tretë për bavarezët që fiksuan shifrat në 3-0 dhe tani e gjithë vëmendja do të përqendrohet te ndeshja me Realin e Madridit, në Ligën e Kampioneve.
Në sfidat e tjera, Hamburgu mori një fitore minimale ndaj Freiburgut, duke mbajtur gjallë shpresat për mbijetesë, ndonëse gjithçka do të jetë mjaft e vështirë, pasi kanë mbetur vetëm 3 javë nga fundi.
Fitore surprizë regjistroi Hofenhaimi, që mposhti 2-5 Leipzigun në transfertë. Skuadra mike bëri diferencën në 45-minutëshin e parë, të cilin e mbylli në avantazh të 3 golave, ndërsa me këtë fitore, rihapi shpresat për një vend në zonën Champions.
