Arsenali zgjedh Unai Emery. Do të jetë spanjolli i cili vetëm pak ditë më parë u largua zyrtarisht nga PSG, pasuesi i Arsene Wenger në stolin e topçinjëve të Londrës. Atëhere kur të gjitha rrugët të çonin të ndihmësi i Pep Guardiolës, ish mesfushori i Arsenalit Mikel Arteta, drejtuesit e klub londinez kanë vendosur tia besojnë pankinën e skuadrës një trajneri me eksperiencë dhe që ka fituar disa trofe në karrierën e tij, duke zgjedhur pikërisht Unai Emery. Marrëveshja mes palëve është arritur dhe tashmë pritet vetëm zyrtarizimi i cili do të vijë në ditët e ardhshme. Emri i Emery ishte përmendur edhe si pasues i mundshëm i Sarrit në stolin e Napolit, por pas eksperiencave me Spartakun e Moskës, Sevillan dhe PSG, spanjolli do të drejtojë në Premier League teksa do të ulet në stolin e Arsenalit.
