Leipzigu merr hak ndaj Bayernit të Mynihut pas eliminimit nga Kupa e Gjermanisë, duke i mposhtur bavarezët 2-1. Wagner i dha epërsinë Bayernit me kokë në minutën e 12-të pas krosimit të James Rodriguez. Sidoqoftë “demat” nuk u demoralizuan, duke kthyer baraspeshën me Naby Keita. Në pjesën e dytë të dyja skuadrat luajtën hapur, në kërkim të golit të fitores.
Në minutën e 59-të kundërsulm i rrezikshëm i Leipzigut. Keita shërben për Timo Werner, me sulmuesin që u tregua gjakftohtë, duke i dhuruar skuadrës vendase golin e fitores. Leipzigi rikthehet tek suksesi në kampionat pas katër javësh, ndërsa për Bayernin kjo ishte humbja e tretë në kampionat, e fundit është regjistruar në nëntor të vitit të kaluar ndaj Gladbahut.
